心靈排毒

現代人著重身體健康，久不久會以飲食、運動幫自己排毒。咁心靈呢？心靈要排毒嗎？

情緒、心結、負能量…等等，久不久，我哋都要放低啲。而所謂嘅放低啲，就係 let go。

講就易囉，點 let 同點 go 呢？

每個人都可以有自己嘅方法舒緩情緒，調整自己，有人會睇本書、睇場戲、做吓小手工、聽歌、跳舞、做瑜伽。我個人比較貪方便，求其有個地方比我閉上眼、專注呼吸十幾分鐘，就得嘞！

你可能會問，就係咁簡單？ 係呀！就係咁簡單。 不過，簡單並唔等於容易。

當你情緒高漲、心情低落、鬱結纏繞、能量失衡時，要令自己靜落嚟，唔易㗎，過程中你可能會將症狀倍大，甚至覺得煩厭，然後迅速放棄，甚至任由自己沉溺喺症狀之中。

細細個嗰陣，唔肯食藥，阿嫲會同我講「苦日良藥，越苦越快好噃」(well，我細個已經覺得亞嫲坤我。人越大就知道，um，老人家智慧，真係要到自己變咗老人家先明）

大個咗去減肥、健身，最常聽到嗰三個字，就係「堅持呀！」

用「靜心」幫自己嘅心靈排毒，何嘗唔係一樣？！就係因為佢直視問題嘅所在，所以一開始會覺得苦。就係因為佢係一個過程，所以我哋要堅持。

不過，又唔駛咁灰！無人叫你一開始就打大佬。靜心、冥想，其實係好個人嘅體驗，無話一定要達到邊啲境界先叫得，得唔得，只有自己知，唔係由人哋幫你評分。簡簡單單，閉上眼睛，呼吸 10 分鐘，比自己享受吓呼吸嘅過程，都可以好得！

可以比自己靜耐啲嗰陣，咪問吓自己「最近點呀？」咪比啲時間自己自問自答囉。

做多幾次，咪同自己講吓數「乜我真係咁嘅咩？」又試吓同自己講「唔係咁都得嘅，放低幾兩，沖走咗，一身鬆哂！」

廣東話聲音導航

文字：Christine Yip @姬絲汀生命日誌

圖片：pixabay.com